पथरी बजारमा रहेको अग्लो खानेपानीको ट्यांकीमाथि चढेर पथरी-१ का २८ वर्षीय रुद्र मगरले सोमबार दिउँसो डेढ घण्टासम्म ताण्डव नृत्य देखाएका थिए । नांगै रहेका उनले पानीट्यांकीको टुप्पामा पुगेर हातमा बोकेको डण्डीले घरि क्रिकेट खेलेकोजस्तो त घरि खुट्टाले फुटबल हानेजस्तो भावभंगी देखाएका थिए । उनको चर्तिकला हेर्न क्षणभरमै सयौं मानिस जम्मा भएका थिए । ६ तले पानीट्यांकीको टुप्पामा चढेर उनी ठूलो स्वरमा कराउँदै उफ्रिएका थिए ।

पानीट्यांकीसँगै जोडिएको घरमा आमासँग बाझेपछि उनी आफूभन्दा अग्लो पर्खाल नाघेर पानी ट्यांकीको टुप्पामा पुगेको उनकी आमाले बताइन् । आधा जिउमा लुगै नलाई चढेका उनलाई ट्यांकीबाट र्झन स्थानीयले आग्रह गर्दा हाफपाइन्ट पनि खोलेर फालेपछि उनी नाङ्गै भएपछि प्रहरीलाई खबर गरिएको थियो ।

रुद्र ट्यांकीमा चढेको डेढ घण्टापछि आइपुगेका प्रहरीले ट्यांकीमा चढेर झार्न खोज्दा उनले आक्रमण गर्न खोजेपछि समस्या भएको थियो । डेढ घण्टासम्म सर्वाङ्ग भएर रमिता देखाएका रुद्रलाई अन्ततः फकाएर भुइँमा झार्न सफल भएको थियो ।

नाङ्गै भुइँमा झरेका उनलाई इलाका प्रहरी कार्यालय पथरीका सई लोकबहादुर दियालीको टोलीले झुण्डाउँदै कार्यालयमा पुर्‍यायो । इप्रकामा पुर्‍याएपछि हिरासतमा आउने थुनुवालाई कुट्न बनाइएको टायरको पञ्जाले यातना दिएर रुद्रलार्इ थप पीडा दिइएको थियो । उनको सोमबार बेलुका  रिहा गरिएको छ