को हुन् एमालेलाई पहिलो पार्टी बन्न नदिने अन्तरघाती ?
काठमाडौं । नेकपा एमालेको केन्द्रीय कमिटी बैठकले देशैभरि करिब १५
स्थानमा पार्टीलाई अन्तरघात गरी हराइएको प्रारम्भिक निश्कर्ष निकालेको छ ।
पार्टीभित्रकै अन्तरघातीले पैसा खाएर विपक्षीलाई नजिताएको भए एमाले पहिलो
पार्टी बन्ने नेताहरुको निश्कर्ष छ ।
एमाले स्रोतका अनुसार काभ्रे क्षेत्र नं
३, संखुवासभा २ र काठमाडौं ९ मा पार्टीको जीत सुनिश्चित रहेको आँकलन गरिएको
थियो । चुनावपूर्व पार्टीले १ सय ६ स्थानमा जित सुनिश्चित भएको अनुमान
गरेकोमा अन्तरघातकै कारण करिब १५ सीटमा हार व्यहोर्नुपरेको निश्कर्ष एमाले
नेताहरुको छ । काभ्रे ३ मा पूर्वसांसद एवं पूर्व जिविस सभापति कृष्णप्रसाद
सापकोटाले नेपाली कांग्रेसका उम्मेद्वारलाई भोटै मागेर हिँडेको र एमाले
उम्मेद्वार गोकुल बास्कोटालाई हराएको आरोप लागेको छ ।
त्यसैगरी काठमाडौं ९ मा कृष्णगोपाल
श्रेष्ठलाई हराउन स्थानीय नेताहरु लागिपरेको श्रेष्ठको आरोप छ । संखुवासभा २
मा केन्द्रीय नेता राजेन्द्र गौतमलाई हराउन एमाले नेता गुप्तबहादुर
श्रेष्ठले २ लाख रुपैयाँ लिएको आरोप लागेको छ । त्यसैगरी धनुषा जिल्लाका
केही क्षेत्रहरुमा एमाले नेताहरुको अन्तरघातकै कारणले पार्टीले पराजय
व्यहोरेको निश्कर्ष एमाले नेताहरुले निकालेका छन् ।
त्यस्तै सिन्धुपाल्चोकमा एमाले उम्मेद्वार
अरुण नेपाललाई पनि अन्तरघातबाटै हराइएको एमाले नेता बताउँछन् । दाङ ४
स्थित पार्टी सचिव शंकर पोखरेलको क्षेत्रमा पनि धाँधली भएको एमाले निश्कर्ष
छ । त्यस्तै मोरङ ९ मा एमाले उम्मेद्वार धनश्याम खतिवडालाई हराएर
कांग्रेसका डिगबहादुर लिम्बुलाई जिताउन भूमिका खेलेका एमाले
कार्यकर्ताविरुद्ध समेत पार्टीमा उजुरी परिसकेको स्रोतले अनलाइनखबरलाई
बतायो । मोरङमा जिल्ला पार्टी उपसचिव विद्या चाम्लिङ, जिल्ला कमिटी
सदस्यद्वय भूपालसिंह जिमी र मानबहादुर श्रेष्ठले अन्तरघात गरेको आरोप
लागेको छ ।
‘लडाइँको मैदानमा उत्रेका बेलामा
पार्टीविरुद्ध घात गर्नेहरुको अब पार्टीमा काम छैन, त्यसैले यस्ता
अन्तरघातीलाई साधारण सदस्यसमेत नरहने गरी पार्टीबाट हटाउनुपर्छ र हटाइन्छ
।’ एमालेका एक नेताले अनलाइनखबरसँग भने ।
पार्टीभित्रका अन्तरघातीहरुलाई हदैसम्मको
कारवाही गरिनुपर्ने माग गर्दै एमाले अखिलका नेताहरुले समेत बल्खुमा यसअघि
नै ज्ञापनपत्र बुझाइसकेका छन् । विद्यार्थी नेतृ नविना लामाका अनुसार
सर्लाही, सुर्खेत, कञ्चनपुर र कैलालीमा एमालेभित्र अन्तरघात भएको रिपोर्ट
प्राप्त भएकाले विद्यार्थी संगठनले बल्खुमा ज्ञापनपत्र बुझाएको हो ।
0 comments
Write Down Your Responses