समाचार » एमाओवादीमा जताजतै भद्रगोल

दश वर्षअघिसम्म सैन्य संरचना र अनुशासनमा चलेको एकीकृत माओवादी अहिले भद्रगोल अवस्थामा छ । अध्यक्ष प्रचण्ड, वरिष्ठ नेता डा. बाबुराम भट्टराई र उपाध्यक्ष नारायणकाजी श्रेष्ठ पक्षको अन्तर्संघर्षले अहिले एमाओवादी र उसका जनवर्गीय संगठन पनि अस्तव्यस्त छन् ।

एमाओवादीले पार्टी सदस्य कति छन् भन्ने विवरणसमेत संकलन गर्न सकेको छैन । पार्टीका महत्त्वपूर्ण विभाग अहिले निष्क्रियजस्तै छन् । केही जनवर्गीय संगठन तथा मोर्चाका राष्ट्रिय सम्मेलन नौ वर्षदेखि हुन सकेका छैनन् । सम्मेलन गरेका संगठनले पनि पदाधिकारीसमेत चयन गर्न सकेका छैनन् ।

शक्तिशाली भ्रातृ संगठन, युवा, मजदुर, विद्यार्थीको सांगठनिक अवस्था लथालिंग छ । उनीहरूलाई परिचालन गर्नसमेत पार्टीले सकेको छैन । पार्टीभित्रको अन्तर्संघर्षले सबै जनवर्गीय संगठनमा असर परेको नेताहरू बताउँछन् ।

एमाओवादी नेताहरू पार्टी भद्रगोल अवस्थामा पुगेको स्वीकार गर्छन् । तर, सार्वजनिक रूपमा भन्न भने रुचाउँदैनन् । ‘पार्टी भद्रगोल रहेको देखिएकै छ, अझै भद्रगोलतर्फ गइरहेको छ,’ एमाओवादीका एक स्थायी समिति सदस्यले भने, ‘तर, शीर्ष नेताहरू भद्रगोल हटाएर पार्टीलाई पद्धतिमा चलाउनुपर्छ भन्नेतर्फ नहुनु दु:खद पक्ष छ । उनीहरू नै पार्टीलाई झन्–झन् भद्रगोल बनाउनेतिर लागेका छन् ।’