चक्रपथ विस्तारमा फेरि तात्यो सरकार
२८ पुस, काठमाडौं । राजधानीको चक्रपथ निर्माण तथा विस्तारमा क्रियाशील
हुन प्रधानमन्त्री कार्यालयका सचिव कृष्णहरि बास्कोटाले निर्माण पक्षलाई
निर्देशन दिएका छन् । भित्री चक्रपथ विस्तार तथा बाहिरी चक्रपथ निर्माण
गर्ने भनी वर्षौदेखि कुरा चल्दै आएको छ ।
दुबै चक्रपथ निर्माण तथा विस्तारबारे
समीक्षा गर्न आइतबार आयोजित कार्यक्रममा उनले सबैलाई क्रियाशील भएर आ-आˆनो
जिम्मेवारी निर्वाह गर्न निर्देशन दिएका हुन् ।
कलंकीदेखि कोटेश्वरसम्मको १०.३९ किलोमिटर
चक्रपथ सन् २०१६ मे १५ मा साइकल लेन र फुटपाथ गरी १० लेनमा विस्तार गर्ने
सरकारी योजना रहेको छ । चीन सरकारको सहयोगमा करिव ४ अर्ब रुपैयाँ लगानीमा
चक्रपथ विस्तार गर्न लागिएको हो ।
उनका अनुसार चक्रपथमा संघाइ कन्स्ट्रक्सन
ग्रुपले क्याम्प खडा गरिसकेको र चिनियाँ प्राविधिकसमेत आइसकेका छन् ।
“आवश्यक उपकरणहरु ल्याइसकियो ” उनले भने “अतिक्रमण गरी बनाइएका टहरा
भत्काउने र रुख कटान पनि सुरु भइसकेको छ ।”
यस क्रममा मनोहरा खोला र कोटेश्वरमा १०/१०
मिटर चौडा दुइवटा पुल निर्माणको काम अगाडि बढिसकेको छ । बल्खुस्थित
बाग्मति नदीमा पुलको जग हाल्ने काम भइरहेको छ । सडक विस्तार गर्दा खानेपानी
र ढलका पाइप, विद्युत र टेलिफोनका तार तथा पोल व्यवस्थापन गर्न प्रत्येक
साता प्राविधिक तहमा समन्वयात्मक बैठक गर्न पनि उनले निर्देशन दिए ।
चीन सरकारले २७ किलोमिटर चक्रपथमा थप सात
किलोमिटर चौडा गर्ने गरी सर्वेक्षण गरेको भित्री चक्रपथ विस्तार आयोजना
प्रमुख अशोक तिवारीले बताए । नवनिर्मित सडकका चार स्थानमा आकाशे पुल (फ्लाई
ओभर ब्रीज) तयार हुने हुँदा ट्राफिक जामको समस्या न्यून हुने अपेक्षा
गरिएको छ ।
करिब १४ वर्षअघि बाहिरी चक्रपथ विस्तारको
सम्भाव्यता अध्ययन भएको थियो । आर्थिक वर्ष २०६१/०६२ को बजेट वक्तव्यमा
बाहिरी चक्रपथ निर्माण गर्ने भनिएपनि हालसम्म निर्माण कार्य बढ्न सकेको
थिएन ।
बाहिरी चक्रपथ निर्माण आयोजना प्रमुख रमा
मानन्धरका अनुसार काठमाडौंको चोभार, गाम्चा, सतुंगल, नैकाप, सितापाइला,
नागार्जुन, नेपालटार, गोंगबु, टोखा, चपली, कपन, जगडोल, सन्डोल र थलिडाँछी
प्रस्तावित चक्रपथका नोडल प्वाइन्ट हुन् ।
त्यसैगरी, भक्तपुरमा गामफेदी, पकाउनेपाटी,
बाँसबारी, याङडोल, मसानडोल, भातेढिकुरो, नयाँ ठिमी र दधिकोट नोडल प्वाइन्ट
तोकिएका छन् । ललितपुरका लुभु, ठैव, धापाखेल, ठेचो, बुङ्गमतीमा चक्रपथ
निर्माणको योजना बनाइएको छ ।
0 comments
Write Down Your Responses