के कुनै मुलुकको भबिष्य त्यसमा मुलुकका जनताको सेक्स लाइफमा अडिएको हुन्छ ?

निधार खुम्च्याएर देश बनाउने चिन्तनमा घोत्लिनेहरुले यसलाई बकबास भन्न सक्छन् । तर, भौतिक बिकाशको फड्को मारिसकेका मुलुकहरुको अबस्थालाई हेर्ने हो त्यसलाई नकार्न सकिन्न ।

हामी कुरा गर्दैछौं युरोपेली मुलुक डेनमार्कको जहाँको एक ट्राभल एजेन्सीले अनौठो बिज्ञापन बनाएर डेनिस जोडीलाई सोच्न बाध्य बनाएको छ ।

त्यहाँको स्पाइस ट्राभलले ‘डू इट फर डेनर्माक’ शीर्षकमा बनाएको बिज्ञापनले भन्छ–‘सेक्सले डेनमार्कको भविश्य बचाउन सक्छ ।’ बढिभन्दा बढि संसर्ग र गर्भधारणले मात्र डेनमार्कको भबिष्य बनाउन सक्ने भन्दै उसले केही अनौठा अफरहरु पनि सार्वजनिक गरेको छ । ट्राभल एजेन्सीले यसका लागि पर्याप्त तर्क पनि दिएको छ । जस्तो डेनमार्कमा जन्मदर पछिल्लो २७ वर्षकै सबैभन्दा कम भएको छ । घट्दो जन्मदरलाई रोक्न  सरकारले पनि बच्चा जन्माउन जोडीहरुलाई प्रोत्साहन गरिरहेको छ ।

डेनिस जोडीले सामान्य दिनभन्दा घुमघाममा निस्कदा ४६ प्रतिशत बढि यौन सम्बन्ध राख्ने गरेको र कुल बच्चाको १० प्रतिशत बच्चाको गर्भधारण घुमघामका बेला हुने गरेको उसको दावी छ ।

बच्चा जन्माउने प्रतियोगितामा भाग लिन आह्वान गर्दै स्पाइस ट्राभलले बच्चा जन्माउनेहरुका लागि भारी छुटको अफर समेत गरेको छ । बच्चा जन्माए बच्चाका लागि तीन वर्षसम्म चाहिने सामाग्री र बच्चामैत्री विदा दिने उसको घोषणा छ ।