आगो लगाइएकी गर्भवती नजरानाको मृत्यु
फागुन, सप्तरी । अन्तर्राष्ट्रिय नारी दिवसकै दिन शनिबार दिउँसो सदरमुकाम
राजविराजमा मट्टीतेल खन्याएर आगो लगाइएकी गर्भवती महिलाको गएराति उपचारका
क्रममा मृत्यु भएपछि छिमेकी शोकमा डुबेका छन् ।
राजविराज नगरपालिका-७ निवासी गुडु
अन्सारीकी श्रीमती अन्दाजी २६ वर्षीया नजराना खातुनको बिपी कोइराला
स्वास्थ्य विज्ञान प्रतिष्ठान धरानमा उपचारका क्रममा मृत्यु भएको हो ।
घरमा सुतिरहेका बेला शनिबार दिउँसो २
बजेतिर अचानक शरीरमा आगो लागेर चिच्याएको सुनेका स्थानीयले नजराना खातुनलाई
उद्धार गरेर उपचारका लागि राजविराजस्थित गजेन्द्रनारायण सिंह सगरमाथा
अञ्चल अस्पतालमा भर्ना गराएका थिए ।
त्यहाँ उपचार सम्भव नभएपछि थप उपचारका
लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको थियो ।
त्यहीँ उपचारका क्रममा गएराति ११ बजेतिर मृत्यु भएको जिल्ला प्रहरी
कार्यालय सप्तरीका प्रवक्ता तथा प्रहरी नायब उपरीक्षक राजकुमार बैदवारले
जानकारी दिए ।
आगोबाट उनको करिब ९० प्रतिशत शरीरको भाग
जलेको थियो । हत्या गरिएको ठानिएकी नजराना पाँच महिनाकी गर्भवती थिइन् ।
नजरानाको मृत्युपछि उनकी दुई वर्षीया छोरी रौनक खातुन टुहुरी भएकी छिन् ।
टुहुरी भएकी रौनक आफन्त र छिमेकीसँग छन् ।
अत्यन्तै मिलनसार र गर्भवती अवस्थाकी
नजरानाको मृत्युको खबर पाउनासाथ स्थानीयबासी शोकमा डुबेका छन् । नजरानाको
छिमेकीसँग राम्रो सम्बन्ध थियो, स्थानीय रैहाना खातुनले भनिन्, ‘के कति
कारणले उनको हत्या गरियो, हामीलाई थाहा छैन, तर जुन किसिमको घटना भयो त्यो
घटना दुःखदायी छ ।’
नजरानाका पति गुडु अन्सारी करिब १५ दिनअघिमात्र वैदेशिक रोजगारका लागि
साउदी अरब पुगेका थिए । नजरानाको घटना रहस्यमय रहेकाले आवश्यक छानबिनका
लागि नजरानाकी सासू बानो खातुन र जेठानी नुरजाहा खातुनलाई नियन्त्रणमा
लिइएको प्रहरी नायब उपरीक्षक बैदवारले जानकारी दिए ।
प्रारम्भिक अनुसन्धानले घटनामा सासु
संलग्न रहेको पाइएको प्रहरीले जनाएको छ । घटनास्थलदेखि करिब ५० मिटरको
दूरीमा रहेको पोखरीको डिलमा मट्टीतेलको भाँडो बरामद भएकाले थप अनुसन्धान
भइरहेको प्रहरी नायब उपरीक्षक बैदवारले बताए ।
यसैबीच प्रहरी नायब उपरीक्षक बैदवार नेतृत्वको टोलीले आइतबार विहान घटनास्थलको निरीक्षण गरेको छ । रासस
0 comments
Write Down Your Responses