जोगीहरु बल्खुमा पुगेर भने-माधव नेपाल जिन्दावाद !
१२
फागुन, काठमाडौं । एमाले मुख्यालय बल्खुमा आइतबार केन्द्रीय कमिटी बैठक
सुरु हुनुअघि जोगीहरुले नारा लगाइरहेका थिए -नेकपा एमाले जिन्दावाद ! माधव
नेपाल जिन्दावाद ! जोगीहरुको दर्शन र कम्युनिस्ट पार्टी निकै ठूलो
विरोधाभाष हो । तर, जोगीहरु एमाले जिन्दावाद भनिरहेका थिए । उनीहरुको
नाराबाजी सुनेपछि बल्खु परिसरमा जम्मा भएका एमाले कार्यकर्ता भन्दै थिए,
‘जोगीहरु पनि व्यावसायिक भएछन् ।’
बैठकमा सहभागी हुन पार्टी मुख्यालय जाँदै
थिए-एमाले बरिष्ठ नेता माधवकुमार नेपाल । शिवरात्री नजिकै आइरहेका बेला
पशुपतिमा जानुपर्ने जोगीहरुको समूह पार्टी कार्यालयमा आएर नाराबाजी गरेको
देखेर उनी अलमलमा परे । जोगीहरुको नाराबाजी हेर्दै पार्टी केन्द्रीय
कार्यालयभित्रै पसे । तर, जोगीले थाहा पाएनन् ।
बैठक सुरु हुनुअघि नै जोगीहरु कार्यालय
परिसर पुगेका थिए । बैठकका लागि नेताहरु धमाधम पार्टी कार्यालयमा प्रवेश
गरिरहेका थिए । नेताहरु कार्यालयमा पुग्दा करिब ३६ जनाभन्दा बढी जोगीले
आफूहरु शिवरात्रिका लागि राजधानी आएको र आफ्ना साथीहरुमध्ये तीनजनालाई
बिहीबार प्रहरीले पक्रेको गुनासो गर्दै छुटाउन बरिष्ठ नेता नेपाल भेट्न
आएको बताएका थिए ।
नेपाल भित्र पसेपछि जोगीहरुको माग बुझ्न
तराई मूलका दुई कार्यकर्ता कार्यालयभित्रबाट बाहिर आए । तर, जोगीहरुले
मानेनन् । उनीहरुले आफूहरु माधवकुमार नेपालको मतदाता भएकाले नेपाललाई नै
भेट्नुपर्ने बताए । उनीहरु पार्टी कार्यालयको क्यान्टिननजिकैको चौरमा
बसिरहेका थिए । माथि बैठकस्थलमा खबर पुगेपछि बरिष्ठ नेता नेपाल उनीहरुलाई
भेट्न तल झरे ।
नेपालले तल झरेर जोगीहरुको गुनासो सुने ।
नेपाल पनि उनीहरु बसेको चौरमै पुगेर गुनासो सुनिरहेका बेला जोगीहरु
भनिरहेको थिए ‘तपाईलाई हामीले भोट हालेर जितायौं, पुलिसले पक्रेका हाम्रा
साथीहरुलाई तपाईले छुटाइदिनुपर्यो ।’
नेपालले उनीहरुलाई कहाँ थुनिएको छ भनेर
सोधेका थिए । जोगीहरुले बौद्ध प्रहरीले थुनेको बताए । नेपालले आफूले
साथीहरुलाई छुटाउन पहल गर्ने आश्वसन दिएर बैठकतिर लागे । शिवरात्रिका लागि
पशुपतिमा आउने क्रममा तीन जोगीलाई प्रहरीले पक्रेको थियो । गाँजासहित
पक्राउ पर्नेमा दुई भारतीय र एक नेपाली जोगी छन् ।
उनीहरुको साथबाट तीन केजी गाँजा बरामद भएको र यो मात्रा धेरै भएकाले पक्राउ गरेको प्रहरीले जनाएको छ ।
पक्राउ परेका जोगीहरुले शिवरात्रिका लागि
आफूहरुले सो गाँजा बोकेको बताएका छन् । तर, ठूलो मात्रामा गाँजा भेटिएकाले
उनीहरुलाई लागुऔषध मुद्दामा कारबाही गर्ने प्रहरीको तयारी रहेको नयाँ
पत्रिकामा खबर छ ।
0 comments
Write Down Your Responses